مدونات ضد المحاكمات : الحرية لمدحت الحداد | الحرية لعصام حشيش | الحرية للدكتور بشر | الحرية لضياء فرحات | الحرية لخيرت الشاطر | الحرية لحسن مالك

بسم الله الرحمن الرحيم
هذه الصوره للطفل عبد الله محمد مهني والده من الاربعين المحالين إلي المحكمه العسكريه الظالمة للأخوان المسلمين وفي يوم الثلاثاء الموافق 18\3\2008 أكمل عبد الله عامه الأول ولكنه عام ملئ بالأحداث وهاهو عبد الله يحكي لنا قصة حياته




بسم الله والحمد لله
والصلاة والسلام على رسول الله
أنا أسمي عبدا الله
وعمري سنة كاملة
أنا لسة نونو صغير
وقصتي كبيرة وتحيير
أصل القصة في ناس ظالمين
ويحاربوا رجال الدين
ويقولوا همّا حلوين
ورجال الدين إرهابيون
لا والله دول ظالمين
ابدا ما يكونوا حلوين
دول بيحاربوا رجال الدين
ويقولوا إحنا وطنيين
هاحكيلكم حكايتهم معايا
واحكموا يا ناس كدة ويايا
وقولولي يا ناس دول حلوين
ولا يا ناس دول ظالمين
إحنا ساكنين في عزبة النخل
هجموا علينا بخمسين فحل
هجموا حوالي الساعة إتنين
قبل الفجر بساعتين
رنوا الجرس يجي مليون
وصحوني من عز النوم
قلت ليه دول مش نايمين
دول بشر ولا شياطين
هجموا وأخدوا بابا مني
وأنا لسة في بطن أمي
قعدت ماما تدعي يارب
وأنا عليها بطب طب
عمر صحي وقال بابا فين
قالتلوا هايجي بعد يومين
عدا يومين بعد يومين
ومر الشهر والشهرين
وبعدين جيت انا الدنيا
وانا عارف بابا راح فين
راح جه عمو وجابلي هدية
ودموعه وقعت عليه
طبعا عارفين جابلي ايه
جاب بزازة إنما ايه
كان نفسي بابا يجبهالي
زي ولاد عمتو وخالي
كان نفسي عنيه تفتح
على بابا ولاقيه بيفرح
كان نفسي يشيلني ويحضني
ويبوس فيه ويهشكني
يبقى يا ناس دول حلوين
ولا يا ناس دول ظالمين
وبعدين رحت لبابا
وكانت أسعد زيارة
قعد بابا يبوس فيا
عاوز أقول براحة عليا
راح بابا قلنا جلوس
قلت أستريح من البوس
راح جه عمو وعمو وعمو
يهنوا بابا وهروني بوس
قلت هو كله بوس
كله يطلع يالا فلوس
كله حط ايده في جيبه
وندهوا لبابا وحطوا في جيبه
وصحاب ماما فتحوا الشنطة
ودخلوا عليها واحدة واحدة
قلتلهم فين للنسنوس
قالوا كفاية عليك البوس
وبقيت أجي كل زيارة
وأدخل من باب المغارة
وفي يوم إدوا لبابا براءة
قلت هاروّح أذيع في الحارة
بابا برئ يا جدعان
مش ارهابي ولا شيطان
جيه الناس وقالولي مبروك
إحنا عارفين إن أبوك
راجل طاهر
طول عمره خلوق
قالوا الحمد الله إن سابوه
لكن في يوميها اعتقلوه
يبقى يا ناس دول حلوين
ولا يا ناس دول ظالمين
راحوا ودوه محكمة عسكرية
وقالوا ده في جماعة إرهابية
قلت إزاي أبويا ارهابي
ده مش جاسوس ولا حتى حرامي
ولا بيغرق عبارات
ولا بيغلي حديد عقارات
قلت يالا الحمد لله
كله بيجري بقدر الله
قلتلها ياماما ماتخفيش
هيخلصوا بسرعة ماتقلقيش
وودونا محكمة ظلماء
بعيدة وداخل الصحراء
قلت في نفسي كلها جلستين
وبالكتير يبقوا عشرين
راحوا عملولنا مش عشرين
عملوا من الجلسات سبعين
وماما شايلاني رايحة جايا
وعمر في ايديها صعبانه عليا
لكن القاضي مبيقدرش
عامل انه اعمى مبيشفش
لو كان عادل كان خرجهم
علشان أزواجهم واولادهم
بعدين اده معاد للحكم
فلت يارب ليك الحكم
وعدا اليوم بعد اليوم
حتى جاء ذاك اليوم
راحوا مأجيلنها شهر
قلت أعوذ بالله من الشر
يبقى يا ناس دول حلوين
ولا ياناس دول ظالمين
قولوا يا ناس خليكواعادلين
إمتى هاتبقوا مش خايفين
علوا الصوت وقولوا ظالمين
داحنا معانا رب معين
بس ياريت ربنا يهديهم
قبل النار ماتولع فيهم
رب رب يا خير مجيب
خرج لي بابا الحبيب
نفسي يارب يجي اليوم
اللي أنام في حضنه وأقوم
قولوا يا ناس كلكوا آمين
آمين يارب العالمين

2 التعليقات :

  1. wireless said...
    ربنا يعين وربنا يفك أسرانا واسرى المسلمين

    وييسر امورهم يارب

    http://0pp0.net

    الى اللقاء
    Anonymous said...
    بارك الله لكم علي مجهوداتتك في نشر الحق والحقيقة وفضح الحكومة الفاسدةوبحاول اكون صادقة مع نفسي واعمل الحقائق عنهم

أضف تعليقك